ye karishma bhi hum dikha baiThe

ye karishma bhī ham dikhā baiThe

bazm-e-dil meñ unheñ bulā baiThe

aaj qad apnā ham ghaTā baiThe

hāl-e-dil kah ke ġham baḌhā baiThe

sab sunā.ūñgā dil kā haal magar

paas aa kar koī zarā baiThe

aib-jūī use jo karnī hai

haath meñ le ke aa.ina baiThe

aañkh kā ḳhushk ho gayā dariyā

jitne aañsū the sab bahā baiThe

fikr-e-mahshar na fikr-e-uqbā hai

nekiyāñ kitnī vo kamā baiThe

kyā karūñgā sameT kar ḳhushiyāñ

dil kī duniyā hī jab luTā baiThe

bint-e-maryam kā hai idhar se guzar

rāste meñ na sar-phirā baiThe

is meñ koī ġharaz hai poshīda

ghar pe mere haiñ aqrabā baiThe

saḳht-tar hai radīf misre kī

'shād' kis tarah qāfiya baiThe

ye karishma bhi hum dikha baiThe

bazm-e-dil mein unhen bula baiThe

aaj qad apna hum ghaTa baiThe

haal-e-dil kah ke gham baDha baiThe

sab sunaunga dil ka haal magar

pas aa kar koi zara baiThe

aib-jui use jo karni hai

hath mein le ke aaina baiThe

aankh ka KHushk ho gaya dariya

jitne aansu the sab baha baiThe

fikr-e-mahshar na fikr-e-uqba hai

nekiyan kitni wo kama baiThe

kya karunga sameT kar KHushiyan

dil ki duniya hi jab luTa baiThe

bint-e-maryam ka hai idhar se guzar

raste mein na sar-phira baiThe

is mein koi gharaz hai poshida

ghar pe mere hain aqraba baiThe

saKHt-tar hai radif misre ki

'shad' kis tarah qafiya baiThe