ye kaun is darja aatishin rakh-rakhaw mein hai

ye kaun is darja ātishīñ rakh-rakhāv meñ hai

ye kis kā chehra hai jo dahakte alaav meñ hai

sadā-e-kun is ke baa'd shāyad kabhī na aa.e

hamārī taḳhlīq apne antim paḌāv meñ hai

ise Thaharne kā hukm de kar ḳharāb mat kar

nadī kā saarā vajūd is ke bahāv meñ hai

ye bint-e-hairat vo be-niyāzī kā devtā hai

mileñge kyā jab tazād itnā subhāv meñ hai

chanāb-e-ġhaiz-o-ġhazab bas itnā ḳhayāl rakhnā

hamārī kul kā.enāt is TuuTī naav meñ hai

jo be-tarah kī ghaTā ruke to ham āñkheñ dekheñ

abhī ye niilā gulāb ik jal-bhrāv meñ hai

ye kaun is darja aatishin rakh-rakhaw mein hai

ye kis ka chehra hai jo dahakte alaw mein hai

sada-e-kun is ke ba'd shayad kabhi na aae

hamari taKHliq apne antim paDaw mein hai

ise Thaharne ka hukm de kar KHarab mat kar

nadi ka sara wajud is ke bahaw mein hai

ye bint-e-hairat wo be-niyazi ka dewta hai

milenge kya jab tazad itna subhaw mein hai

chanab-e-ghaiz-o-ghazab bas itna KHayal rakhna

hamari kul kaenat is TuTi naw mein hai

jo be-tarah ki ghaTa ruke to hum aankhen dekhen

abhi ye nila gulab ek jal-bhraw mein hai