ye kaun sa suraj mere pahlu mein khaDa hai

ye kaun sā sūraj mire pahlū meñ khaḌā hai

mujh se to 'rashīd' ab mirā saaya bhī baḌā hai

tū jis pe ḳhafā hai mire andar kā ye insān

us baat pe mujh se bhī ka.ī baar laḌā hai

dekhā jo palaT kar to mire saa.e meñ gum thā

vo shaḳhs jo mujh se qad-o-qāmat meñ baḌā hai

sadiyoñ use paalā hai samundar ne sadaf meñ

pal-bhar ke liye jo mirī palkoñ meñ jaḌā hai

ḳhurshīd ke chehre pe lakīreñ haiñ lahū kī

ḳhanjar sā koī raat ke siine meñ gaḌā hai

ik lafz jo niklā thā safeñ dil kī ulaT kar

muddat se mire lab pe vo be-jān paḌā hai

Takrā ke palaTtā huuñ lagātār udhar se

ye sañg-sifat kaun sar-e-rāh khaḌā hai

ye kaun sa suraj mere pahlu mein khaDa hai

mujh se to 'rashid' ab mera saya bhi baDa hai

tu jis pe KHafa hai mere andar ka ye insan

us baat pe mujh se bhi kai bar laDa hai

dekha jo palaT kar to mere sae mein gum tha

wo shaKHs jo mujh se qad-o-qamat mein baDa hai

sadiyon use pala hai samundar ne sadaf mein

pal-bhar ke liye jo meri palkon mein jaDa hai

KHurshid ke chehre pe lakiren hain lahu ki

KHanjar sa koi raat ke sine mein gaDa hai

ek lafz jo nikla tha safen dil ki ulaT kar

muddat se mere lab pe wo be-jaan paDa hai

Takra ke palaTta hun lagatar udhar se

ye sang-sifat kaun sar-e-rah khaDa hai