ye KHayal ab to dil-azar hamare liye hai

ye ḳhayāl ab to dil-āzār hamāre liye hai

āḳhir-e-shab koī be-dār hamāre liye hai

ham ajab dekh ke sarshār hue jaate haiñ

jaise ye garmī-e-bāzār hamāre liye hai

ḳhāna-e-zīst meñ rahtā hai ujālā shab bhar

koī raushan sar-e-dīvār hamāre liye hai

ḳhatm hone ko nahīñ saḳhtī-e-ālām-e-safar

raah meñ phir koī kohsār hamāre liye hai

DhūñDte rahte haiñ ashjār mah-o-sāl meñ ham

kyā koī shāḳh-e-samar-dār hamāre liye hai

ab khulā us badan-e-gul pe hai mausam kā asar

ham samajhte the vo bīmār hamāre liye hai

koī to abr kī mānind masāfat meñ 'salīm'

dhuup se bar-sar-e-paikār hamāre liye hai

ye KHayal ab to dil-azar hamare liye hai

aaKHir-e-shab koi be-dar hamare liye hai

hum ajab dekh ke sarshaar hue jate hain

jaise ye garmi-e-bazar hamare liye hai

KHana-e-zist mein rahta hai ujala shab bhar

koi raushan sar-e-diwar hamare liye hai

KHatm hone ko nahin saKHti-e-alam-e-safar

rah mein phir koi kohsar hamare liye hai

DhunDte rahte hain ashjar mah-o-sal mein hum

kya koi shaKH-e-samar-dar hamare liye hai

ab khula us badan-e-gul pe hai mausam ka asar

hum samajhte the wo bimar hamare liye hai

koi to abr ki manind masafat mein 'salim'

dhup se bar-sar-e-paikar hamare liye hai