ye KHayal-e-shauq-parwar dil ke bahlane ko hai

ye ḳhayāl-e-shauq-parvar dil ke bahlāne ko hai

koī be-ruḳh be-ruḳhī se baaz aa jaane ko hai

ye muamma mai-kade meñ kaun suljhāne ko hai

be-ḳhudī hushyār ko aur hosh dīvāne ko hai

rāz-e-dar-parda kā parda ḳhud-baḳhud uTh jā.egā

bas faqat un se nazar do-chār ho jaane ko hai

mai-kade meñ shaiḳh ka aanā shagun achchhā nahīñ

hosh kī le sāqiyā rindoñ ko bahkāne ko hai

sādgī shashdar khaḌī hai shoḳhiyāñ sīna-sipar

ik adā jaane ko hai aur ik adā aane ko hai

allāh allāh ye nizām-e-hosh-o-mastī sāqiyā

hosh mastāne ko hai aur kaif paimāne ko hai

jām-o-mīnā kī zarūrat hī nahīñ 'majrūh' ko

mast nazroñ se koī mad.hosh farmāne ko hai

ye KHayal-e-shauq-parwar dil ke bahlane ko hai

koi be-ruKH be-ruKHi se baz aa jaane ko hai

ye muamma mai-kade mein kaun suljhane ko hai

be-KHudi hushyar ko aur hosh diwane ko hai

raaz-e-dar-parda ka parda KHud-baKHud uTh jaega

bas faqat un se nazar do-chaar ho jaane ko hai

mai-kade mein shaiKH ka aana shagun achchha nahin

hosh ki le saqiya rindon ko bahkane ko hai

sadgi shashdar khaDi hai shoKHiyan sina-sipar

ek ada jaane ko hai aur ek ada aane ko hai

allah allah ye nizam-e-hosh-o-masti saqiya

hosh mastane ko hai aur kaif paimane ko hai

jam-o-mina ki zarurat hi nahin 'majruh' ko

mast nazron se koi madhosh farmane ko hai