ye KHwab ki bedari-e-taqdir-e-mohabbat

ye ḳhvāb ki bedārī-e-taqdīr-e-mohabbat

ye ḳhvāb ki afsāna-e-tāsīr-e-mohabbat

qur.ān-e-mohabbat hai ki tafsīr-e-mohabbat

har lafz meñ hai āya-e-tat.hīr-e-mohabbat

vo 'ishq kī ārāsta pairāsta timsāl

maiñ husn kī khīñchī huī tasvīr-e-mohabbat

sar-tā-ba-qadam jalva-e-allāhu-jamīlun

vo husn ke anvār-o-tanvīr-e-mohabbat

qurbān maiñ un kī nigah-e-nāz ke qurbāñ

sau jaan se dil hai hadaf-e-tīr-e-mohabbat

duniyā-e-mohabbat meñ ḳhirad kaam na aa.ī

hai kār-e-junūñ sāhib-e-taqdīr-e-mohabbat

sad-shukr ki uTh hī ga.e vo hosh ke parde

kaam aa hī gayā nāla-e-shabgīr-e-mohabbat

jis vaqt huā josh-e-junūñ silsila-e-jumbāñ

har saañs banā halqa-e-zanjīr-e-mohabbat

vo qalb kī dhaḌkan meñ mohabbat ke fasāne

goyā lab-e-ḳhāmosh meñ taqrīr-e-mohabbat

kal raat ko mehmān thā vīrāna-e-dil meñ

me'mār-e-junūñ sāhib-e-tā'mīr-e-mohabbat

ye KHwab ki bedari-e-taqdir-e-mohabbat

ye KHwab ki afsana-e-tasir-e-mohabbat

quran-e-mohabbat hai ki tafsir-e-mohabbat

har lafz mein hai aaya-e-tathir-e-mohabbat

wo 'ishq ki aarasta pairasta timsal

main husn ki khinchi hui taswir-e-mohabbat

sar-ta-ba-qadam jalwa-e-allahu-jamilun

wo husn ke anwar-o-tanwir-e-mohabbat

qurban main un ki nigah-e-naz ke qurban

sau jaan se dil hai hadaf-e-tir-e-mohabbat

duniya-e-mohabbat mein KHirad kaam na aai

hai kar-e-junun sahib-e-taqdir-e-mohabbat

sad-shukr ki uTh hi gae wo hosh ke parde

kaam aa hi gaya nala-e-shabgir-e-mohabbat

jis waqt hua josh-e-junun silsila-e-jumban

har sans bana halqa-e-zanjir-e-mohabbat

wo qalb ki dhaDkan mein mohabbat ke fasane

goya lab-e-KHamosh mein taqrir-e-mohabbat

kal raat ko mehman tha virana-e-dil mein

me'mar-e-junun sahib-e-ta'mir-e-mohabbat