ye kis ki justuju hai aur main hun

ye kis kī justujū hai aur maiñ huuñ

maqām-e-dasht-e-hū hai aur maiñ huuñ

chaman meñ dekhtā phirtā huuñ kis ko

fareb-e-rañg-o-bū hai aur maiñ huuñ

ba-roz-e-hashr taaza gul khilegā

vo dāman kā lahū hai aur maiñ huuñ

kabhī dīvāna thā par ab huuñ hushiyār

garebāñ kā rafū hai aur maiñ huuñ

himāqat hazrat-e-vā.is kī dekho

taqāzā-e-vuzū hai aur maiñ huuñ

na pūchho dil meñ kyā kyā hasrateñ haiñ

tumhārī aarzū hai aur maiñ huuñ

bhalā ho tishna-kāmī aur terā

mai-o-jām-o-subū hai aur maiñ huuñ

rahūñgā kah ke dil kā mājrā sab

are mahshar meñ to hai aur maiñ huuñ

vo kahte haiñ kaho ai 'shauq' kyā hai

are ḳhalvat hai tū hai aur maiñ huuñ

ye kis ki justuju hai aur main hun

maqam-e-dasht-e-hu hai aur main hun

chaman mein dekhta phirta hun kis ko

fareb-e-rang-o-bu hai aur main hun

ba-roz-e-hashr taza gul khilega

wo daman ka lahu hai aur main hun

kabhi diwana tha par ab hun hushiyar

gareban ka rafu hai aur main hun

himaqat hazrat-e-wais ki dekho

taqaza-e-wuzu hai aur main hun

na puchho dil mein kya kya hasraten hain

tumhaari aarzu hai aur main hun

bhala ho tishna-kaami aur tera

mai-o-jam-o-subu hai aur main hun

rahunga kah ke dil ka majra sab

are mahshar mein to hai aur main hun

wo kahte hain kaho ai 'shauq' kya hai

are KHalwat hai tu hai aur main hun