ye kis ki KHushbu DhunDe hai ye kis ka daman mange hai

ye kis kī ḳhushbū DhūñDe hai ye kis kā dāmāñ māñge hai

do-chār guloñ kī baat nahīñ dil saarā gulistāñ māñge hai

har aabla nashtar chāhe hai har zaḳhm namak-dāñ māñge hai

ye 'ishq-e-vafā-pesha un se bedād-e-farāvāñ māñge hai

ho mehr-o-vafā kī ek kiran yā jalte diye kuchh ashkoñ ke

ye tīra-nasībī tīra-shabī ik sham'-e-farozāñ māñge hai

phir nāḳhun-e-ġham baḌh aa.e haiñ phir sar meñ hai saudā sahrā kā

ye shauq-e-numū ye zauq-e-junūñ phir fasl-e-bahārāñ māñge hai

ai dil jab ġham raas aa hī gayā phir minnat-e-chāra-sāzāñ kyā

ab dard hī 'ain-e-darmāñ hai kyoñ dard kā darmāñ māñge hai

ye kis ki KHushbu DhunDe hai ye kis ka daman mange hai

do-chaar gulon ki baat nahin dil sara gulistan mange hai

har aabla nashtar chahe hai har zaKHm namak-dan mange hai

ye 'ishq-e-wafa-pesha un se bedad-e-farawan mange hai

ho mehr-o-wafa ki ek kiran ya jalte diye kuchh ashkon ke

ye tira-nasibi tira-shabi ek sham'-e-farozan mange hai

phir naKHun-e-gham baDh aae hain phir sar mein hai sauda sahra ka

ye shauq-e-numu ye zauq-e-junun phir fasl-e-bahaaran mange hai

ai dil jab gham ras aa hi gaya phir minnat-e-chaara-sazan kya

ab dard hi 'ain-e-darman hai kyon dard ka darman mange hai