ye kis maqam pe pahuncha hai karwan-e-wafa

ye kis maqām pe pahuñchā hai kārvān-e-vafā

hai ek zahr sā phailā huā fazāoñ meñ

nishān-e-rāh kī rakhte to haiñ ḳhabar lekin

zabāñ pe taale haiñ aur beḌiyāñ haiñ paañv meñ

phire haiñ muddatoñ insān kī talāsh meñ ham

vo shahr meñ nazar aaya hameñ na gaañv meñ

sar-e-niyāz bhī apnā kabhī na ḳham hogā

jhalak ġhurūr kī hai aap kī adāoñ meñ

zamīñ se tā-ba-falak har taraf ta'affun hai

guloñ kī bū kā pata kyā chale havāoñ meñ

ye kis maqam pe pahuncha hai karwan-e-wafa

hai ek zahr sa phaila hua fazaon mein

nishan-e-rah ki rakhte to hain KHabar lekin

zaban pe tale hain aur beDiyan hain panw mein

phire hain muddaton insan ki talash mein hum

wo shahr mein nazar aaya hamein na ganw mein

sar-e-niyaz bhi apna kabhi na KHam hoga

jhalak ghurur ki hai aap ki adaon mein

zamin se ta-ba-falak har taraf ta'affun hai

gulon ki bu ka pata kya chale hawaon mein