ye kis maqam se aaKHir palaT gaya hai tu

ye kis maqām se āḳhir palaT gayā hai tū

mire habīb batā kis jagah chhupā hai tū

hayāt aa ke yahāñ par Thaharne vaalī hai

kisī ke paañv kī aahaT pe boltā hai tū

jahāñ bhī shaam huī mujh ko terī yaad aa.ī

shab-e-firāq meñ sun āḳhirī duā hai tū

guzartā vaqt kahāñ ḳhud ko bhī chhupā paayā

zamāna jis meñ ayaañ hai vo ā.īna hai tū

kisī ne dekhā kahāñ vasl kī ghaḌī kā mizāj

hamārī jaañ pe banī aur hañs rahā hai tū

kitāb-e-qalb pe sūd-o-ziyāñ kī baat na likh

savād-e-dard hai tū dard-e-lā-davā hai tū

kabhī jalā.e mujhe aur paar utāre kabhī

mirā ḳhudā bhī hai aur nāḳhudā hai tū

tire sivā mire zaḳhmoñ kā indimāl nahīñ

mirī ḳhushī se mire ġham se āshnā hai tū

zamāne guzre to 'īraj' ne bhī yahī samjhā

ki ibtidā se juḌī merī intihā hai tū

ye kis maqam se aaKHir palaT gaya hai tu

mere habib bata kis jagah chhupa hai tu

hayat aa ke yahan par Thaharne wali hai

kisi ke panw ki aahaT pe bolta hai tu

jahan bhi sham hui mujh ko teri yaad aai

shab-e-firaq mein sun aaKHiri dua hai tu

guzarta waqt kahan KHud ko bhi chhupa paya

zamana jis mein ayan hai wo aaina hai tu

kisi ne dekha kahan wasl ki ghaDi ka mizaj

hamari jaan pe bani aur hans raha hai tu

kitab-e-qalb pe sud-o-ziyan ki baat na likh

sawad-e-dard hai tu dard-e-la-dawa hai tu

kabhi jalae mujhe aur par utare kabhi

mera KHuda bhi hai aur naKHuda hai tu

tere siwa mere zaKHmon ka indimal nahin

meri KHushi se mere gham se aashna hai tu

zamane guzre to 'iraj' ne bhi yahi samjha

ki ibtida se juDi meri intiha hai tu