ye kis miTTi mein apni mehnaton ko bo gae hain

ye kis miTTī meñ apnī mehnatoñ ko bo ga.e haiñ

yahāñ to sabr ke phal itne kaḌve ho ga.e haiñ

hameñ azbar hai ḳhargosh aur kachhve kī kahānī

so ham kachhve bane haiñ rāste meñ so ga.e haiñ

bhalā maiñ tere kachche āñsuoñ kā kyā karūñgā

mujhe mere parinde itnā achchhā ro ga.e haiñ

aur ab jannat meñ gandum kā bahāna na.iiñ chalegā

ye sab is baar pahle tai kiyā hai to ga.e haiñ

mujhe har shaam dariyā ke kināre kāTnī hai

mire kuchh log us ke pāniyoñ meñ kho ga.e haiñ

bhare bāzār meñ rang-rez un par chīḳhtā thā

tirī chunrī ke kuchh rangoñ ko bādal dho ga.e haiñ

ye kis miTTi mein apni mehnaton ko bo gae hain

yahan to sabr ke phal itne kaDwe ho gae hain

hamein azbar hai KHargosh aur kachhwe ki kahani

so hum kachhwe bane hain raste mein so gae hain

bhala main tere kachche aansuon ka kya karunga

mujhe mere parinde itna achchha ro gae hain

aur ab jannat mein gandum ka bahana nain chalega

ye sab is bar pahle tai kiya hai to gae hain

mujhe har sham dariya ke kinare kaTni hai

mere kuchh log us ke paniyon mein kho gae hain

bhare bazar mein rang-rez un par chiKHta tha

teri chunri ke kuchh rangon ko baadal dho gae hain