یہ کس نے جلوہ دکھا کے آنکھوں میں کر لیا ہے مقام اپنا

یہ کس نے جلوہ دکھا کے آنکھوں میں کر لیا ہے مقام اپنا

یہ کس کو اپنا بنا کے برہم کیا ہے دل نے نظام اپنا

یہ کس کی باتوں میں آ کے ہم نے کیا ہے بدنام نام اپنا

کہ آج تک آگہی سے عاجز ہے جذبۂ ناتمام اپنا

اگر تمنائے بے خودی کی زباں سے سن لیں پیام اپنا

تو عارض حسن سے الٹ دیں نقاب وہ لا کلام اپنا

نگاہ ساقی سے کہہ رہا ہوں سزا توجہ کی سہ رہا ہوں

شراب رحمت کے دور میں بھی کرم سے خالی ہے جام اپنا

جہاں میں ہیں خوش نصیب اکثر ہے جن پہ لطف نظر سراسر

اگر مقابل ہوں کیا عجب ہے مجھے بھی کر لیں غلام اپنا

نشانۂ حسن ہو رہا ہے فراق میں عمر کھو رہا ہے

نظر سے فرصت ملے تو دل بھی کرے کوئی انتظام اپنا

ہے منظر بزم شادؔ او راحت بہ قلب مسرور عین نعمت

مذاق شعر و سخن ہے اہل ادب میں ہے احترام اپنا