ye kis ne yun use diwana-war dekha hai

ye kis ne yuuñ use dīvāna-vār dekhā hai

ki us ne apnī taraf bār-bār dekhā hai

mirā mazāq na pūchho bahār ko maiñ ne

haTā ke parda-e-rang-e-bahār dekhā hai

jahāñ se shauq ne sajdoñ ke baa'd uThā.ī jabīñ

vahīñ pe naqsh-e-kaf-e-pā-e-yār dekhā hai

dikhā rahī hai jo dīvāngī-e-ishq mujhe

kisī ne reh ke kabhī hoshiyār dekhā hai

mirī umīd-e-masarrat pe kyoñ ḳhafā ho tum

banā ke ġham ko kabhī ḳhush-gavār dekhā hai

bajā ki ik hamīñ ahl-e-nazar nahīñ lekin

kisī ne yuuñ tumheñ dīvāna-vār dekhā hai

karāhne lagī mere lahū kī ik ik buuñd

jab un ko apne liye ashk-bār dekhā hai

ye kis ne yun use diwana-war dekha hai

ki us ne apni taraf bar-bar dekha hai

mera mazaq na puchho bahaar ko main ne

haTa ke parda-e-rang-e-bahaar dekha hai

jahan se shauq ne sajdon ke ba'd uThai jabin

wahin pe naqsh-e-kaf-e-pa-e-yar dekha hai

dikha rahi hai jo diwangi-e-ishq mujhe

kisi ne reh ke kabhi hoshiyar dekha hai

meri umid-e-masarrat pe kyon KHafa ho tum

bana ke gham ko kabhi KHush-gawar dekha hai

baja ki ek hamin ahl-e-nazar nahin lekin

kisi ne yun tumhein diwana-war dekha hai

karahne lagi mere lahu ki ek ek bund

jab un ko apne liye ashk-bar dekha hai