ye koi bagh nahin phul khilae jaen

ye koī baaġh nahīñ phuul khilā.e jaa.eñ

dasht meñ aa.e haiñ to ḳhaak uḌaa.e jaa.eñ

sab biThāte haiñ hameñ mansab-o-masnad pe magar

ham ye chāheñ ki tire saath biThā.e jaa.eñ

uñgliyāñ kaan meñ Thūñse hue phirte haiñ sabhī

aap āvāz lagāte haiñ lagā.e jaa.eñ

bas isī shart pe āñkheñ tumheñ de saktā huuñ

in ko dekhe hue manzar na dikhā.e jaa.eñ

inhīñ yādoñ ke sahāre hī tirā hijr kaTe

ye parinde mirī chhat se na uḌaa.e jaa.eñ

āsmāñ chhūne kā haq aap kā taslīm hameñ

kuchh ta'alluq to zamīñ se bhī nibhā.e jaa.eñ

ye koi bagh nahin phul khilae jaen

dasht mein aae hain to KHak uDae jaen

sab biThate hain hamein mansab-o-masnad pe magar

hum ye chahen ki tere sath biThae jaen

ungliyan kan mein Thunse hue phirte hain sabhi

aap aawaz lagate hain lagae jaen

bas isi shart pe aankhen tumhein de sakta hun

in ko dekhe hue manzar na dikhae jaen

inhin yaadon ke sahaare hi tera hijr kaTe

ye parinde meri chhat se na uDae jaen

aasman chhune ka haq aap ka taslim hamein

kuchh ta'alluq to zamin se bhi nibhae jaen