ye kufr humne kiya umr-bhar KHuda jaane

ye kufr ham ne kiyā umr-bhar ḳhudā jaane

ḳhudā kī zaat ko insāñ se māvarā jaane

qafas meñ aa.e nasheman jalā chaman chhūTā

ab aur kitnī balā.eñ raheñ ḳhudā jaane

banā liyā hai agar ma.asiyat ko maiñ ne mizāj

to is zamīn pe ham bojh haiñ ḳhudā jaane

fareb-e-nafs kā kitnā hasīn pahlū hai

ham apne dard-e-mohabbat ko lā-davā jaane

nigāh-e-mast meñ rūh-e-sharāb hotī hai

nazar se jis ne na pī ho kabhī vo kyā jaane

zabān chup hai nigāheñ kalām kartī haiñ

sukūt meñ ho takallum to koī kyā jaane

hazār baar hameñ vaqt ne batāyā hai

burā vo ḳhud hai zamāne ko jo burā jaane

ḳhirad kī āḳhirī had hai junūñ kā pahlā qadam

ye ibtidā hai to phir intihā ḳhudā jaane

ye kā.enāt hamāre liye banā.ī ga.ī

ḳhudā.ī karne ham aa.e yahāñ ḳhudā jaane

ye kufr hum ne kiya umr-bhar KHuda jaane

KHuda ki zat ko insan se mawara jaane

qafas mein aae nasheman jala chaman chhuTa

ab aur kitni balaen rahen KHuda jaane

bana liya hai agar masiyat ko main ne mizaj

to is zamin pe hum bojh hain KHuda jaane

fareb-e-nafs ka kitna hasin pahlu hai

hum apne dard-e-mohabbat ko la-dawa jaane

nigah-e-mast mein ruh-e-sharab hoti hai

nazar se jis ne na pi ho kabhi wo kya jaane

zaban chup hai nigahen kalam karti hain

sukut mein ho takallum to koi kya jaane

hazar bar hamein waqt ne bataya hai

bura wo KHud hai zamane ko jo bura jaane

KHirad ki aaKHiri had hai junun ka pahla qadam

ye ibtida hai to phir intiha KHuda jaane

ye kaenat hamare liye banai gai

KHudai karne hum aae yahan KHuda jaane