ye kya andaz hain dast-e-junun-e-fitna-saman ke

ye kyā andāz haiñ dast-e-junūn-e-fitna-sāmāñ ke

uḌaa.e jā rahe haiñ chaak kyuuñ sahrā ke dāmāñ ke

abhī tum ne nahīñ dekhe sharāre āh-e-sozāñ ke

abhī sho.ale kahāñ bhaḌke haiñ dil meñ dard-e-pinhāñ ke

havādis kī havāoñ ne ghaTā dī lau mohabbat kī

diye maddham se hote jā rahe haiñ bazm-e-jānāñ ke

vafā ke gul hī vo gul haiñ ki jo daa.im mahakte haiñ

vagarna ye kahāñ hai baat phūloñ meñ gulistāñ ke

jalāo ḳhūn-e-dil mahfil meñ jab kuchh raushnī hogī

añdherā har taraf chhāyā huā hai bazm-e-jānāñ ke

guloñ se tāzgī phūloñ se rañgat ho ga.ī ruḳhsat

sabā ne kaan meñ kyā kah diyā fasl-e-bahārāñ ke

unheñ bhī shams' kī hālat pe rahm aa hī gayā āḳhir

na dekhe jā sake paiham mazālim charḳh-e-gardāñ ke

ye kya andaz hain dast-e-junun-e-fitna-saman ke

uDae ja rahe hain chaak kyun sahra ke daman ke

abhi tum ne nahin dekhe sharare aah-e-sozan ke

abhi shoale kahan bhaDke hain dil mein dard-e-pinhan ke

hawadis ki hawaon ne ghaTa di lau mohabbat ki

diye maddham se hote ja rahe hain bazm-e-jaanan ke

wafa ke gul hi wo gul hain ki jo daim mahakte hain

wagarna ye kahan hai baat phulon mein gulistan ke

jalao KHun-e-dil mahfil mein jab kuchh raushni hogi

andhera har taraf chhaya hua hai bazm-e-jaanan ke

gulon se tazgi phulon se rangat ho gai ruKHsat

saba ne kan mein kya kah diya fasl-e-bahaaran ke

unhen bhi shams' ki haalat pe rahm aa hi gaya aaKHir

na dekhe ja sake paiham mazalim charKH-e-gardan ke