ye kya ki gali mein tera aana nahin hota

ye kyā ki galī meñ tirā aanā nahīñ hotā

is darja satānā bhī to achchhā nahīñ hotā

ham shahr-e-mohabbat meñ kareñ laakh charāġhāñ

jab tak na jale dil to ujālā nahīñ hotā

ham-zād mirā saath mire rahtā hai har-dam

jab saath vo hotā hai to phir kyā nahīñ hotā

fitrat meñ hai dariyā bhī samundar ke barābar

ye baat alag hai ki vo gahrā nahīñ hotā

asbāb kī muhtāj nahīñ raushnī dil kī

bujh jaa.e diyā tab bhī añdherā nahīñ hotā

barsoñ kī ravānī pe hai mauqūf ye vus.at

dariyā koī do din meñ to dariyā nahīñ hotā

rahtī haiñ mire saath tirī yādeñ bhī 'āqib'

maiñ room meñ apne kabhī tanhā nahīñ rahtā

ye kya ki gali mein tera aana nahin hota

is darja satana bhi to achchha nahin hota

hum shahr-e-mohabbat mein karen lakh charaghan

jab tak na jale dil to ujala nahin hota

ham-zad mera sath mere rahta hai har-dam

jab sath wo hota hai to phir kya nahin hota

fitrat mein hai dariya bhi samundar ke barabar

ye baat alag hai ki wo gahra nahin hota

asbab ki muhtaj nahin raushni dil ki

bujh jae diya tab bhi andhera nahin hota

barson ki rawani pe hai mauquf ye wusat

dariya koi do din mein to dariya nahin hota

rahti hain mere sath teri yaaden bhi 'aqib'

main room mein apne kabhi tanha nahin rahta