ye kya ki KHalq ko pura dikhai deta hun

ye kyā ki ḳhalq ko puurā dikhā.ī detā huuñ

magar maiñ ḳhud ko adhūrā sujhā.ī detā huuñ

ajal ko jā ke garebān se pakaḌ laa.e

maiñ zindagī ko vahāñ tak rasā.ī detā huuñ

maiñ apne jism ke sab munqasim havāloñ ko

ba-nām-e-rizq suḳhan kī kamā.ī detā huuñ

vo zindagī meñ mujhe phir kabhī nahīñ miltā

maiñ apne ḳhvāboñ se jis ko rihā.ī detā huuñ

mujhe sila na satā.ish na adl hai matlūb

maiñ apne sāmne apnī safā.ī detā huuñ

ye shor merā taḳhātub nahīñ sunegā 'alī'

maiñ ḳhāmushī ko mukammal sunā.ī detā huuñ

ye kya ki KHalq ko pura dikhai deta hun

magar main KHud ko adhura sujhai deta hun

ajal ko ja ke gareban se pakaD lae

main zindagi ko wahan tak rasai deta hun

main apne jism ke sab munqasim hawalon ko

ba-nam-e-rizq suKHan ki kamai deta hun

wo zindagi mein mujhe phir kabhi nahin milta

main apne KHwabon se jis ko rihai deta hun

mujhe sila na sataish na adl hai matlub

main apne samne apni safai deta hun

ye shor mera taKHatub nahin sunega 'ali'

main KHamushi ko mukammal sunai deta hun