ye kya lutf-e-shor-e-fughan rah gaya

ye kyā lutf-e-shor-e-fuġhāñ rah gayā

zamīñ rah ga.ī āsmāñ rah gayā

abhī nāma-bar ko ravāna kiyā

abhī kah rahā huuñ kahāñ rah gayā

tire lutf ne kī yahāñ tak kamī

jo pahle yaqīñ thā gumāñ rah gayā

mile ḳhaak meñ yuuñ ki mash.hūr hai

miTe yuuñ ki miTnā nishāñ rah gayā

vahī gardisheñ haiñ vahī chaal hai

sitam kaun sā āsmāñ rah gayā

rahī āshnā.ī faqat naam kī

vo naam āshnā-e-zabāñ rah gayā

maiñ vāmāñda aur kah rahā hai jaras

rahā jo pas-e-kārvāñ rah gayā

mirā naala barq-e-jahāñ-soz hai

agar yuuñ hī ātish-fishāñ rah gayā

bahut duur pahuñcheñ nigāheñ vale

vo parde meñ ab bhī nihāñ rah gayā

ye kāhil huuñ 'sālik' ġham-e-hijr se

vahīñ kā rahā maiñ jahāñ rah gayā

ye kya lutf-e-shor-e-fughan rah gaya

zamin rah gai aasman rah gaya

abhi nama-bar ko rawana kiya

abhi kah raha hun kahan rah gaya

tere lutf ne ki yahan tak kami

jo pahle yaqin tha guman rah gaya

mile KHak mein yun ki mashhur hai

miTe yun ki miTna nishan rah gaya

wahi gardishen hain wahi chaal hai

sitam kaun sa aasman rah gaya

rahi aashnai faqat nam ki

wo nam aashna-e-zaban rah gaya

main wamanda aur kah raha hai jaras

raha jo pas-e-karwan rah gaya

mera nala barq-e-jahan-soz hai

agar yun hi aatish-fishan rah gaya

bahut dur pahunchen nigahen wale

wo parde mein ab bhi nihan rah gaya

ye kahil hun 'salik' gham-e-hijr se

wahin ka raha main jahan rah gaya