ye kya tamasha hai jab bhi aae to guzre barq-o-sharar ban kar

ye kyā tamāshā hai jab bhī aa.e to guzre barq-o-sharār ban kar

kabhī to Thahro sukūñ kī sūrat kabhī to aao qarār ban kar

abhī to sab iḳhtiyār meñ hai phiroge be-iḳhtiyār ban kar

tumhāre kūche se kushta-e-ġham uThegā jis din ġhubār ban kar

abhī ho nā-āshnā-e-ulfat abhī ho nā-vāqif-e-mohabbat

abhī kahāñ zindagī guzārī mirī tarah be-qarār ban kar

umīdeñ karvaT badal rahī haiñ fasurda dil kī kalī khilī hai

mire gulistān-e-zindagī meñ ye kaun aaya bahār ban kar

tire hī va.adoñ pe ai sitamgar tujhe ḳhabar bhī nahīñ hai shāyad

hazāroñ rāteñ guzār dī haiñ mujassam-e-intizār ban kar

ye kya tamasha hai jab bhi aae to guzre barq-o-sharar ban kar

kabhi to Thahro sukun ki surat kabhi to aao qarar ban kar

abhi to sab iKHtiyar mein hai phiroge be-iKHtiyar ban kar

tumhaare kuche se kushta-e-gham uThega jis din ghubar ban kar

abhi ho na-ashna-e-ulfat abhi ho na-waqif-e-mohabbat

abhi kahan zindagi guzari meri tarah be-qarar ban kar

umiden karwaT badal rahi hain fasurda dil ki kali khili hai

mere gulistan-e-zindagi mein ye kaun aaya bahaar ban kar

tere hi wadon pe ai sitamgar tujhe KHabar bhi nahin hai shayad

hazaron raaten guzar di hain mujassam-e-intizar ban kar