ye kya zarur hamin ko wo aazmaega

ye kyā zarūr hamīñ ko vo āzmā.egā

har aane vaalā muqaddar bhī saath lā.egā

kise ḳhabar hai ki is tīra-ḳhāk-dāñ ke liye

hai ek dil hī to raushan so Duub jā.egā

khule darīchoñ se yuuñ jhāñktī hai māyūsī

ki jaise ab koī jhoñkā idhar na aa.egā

udaas raat kī sargoshiyoñ ke ba.ad agar

sahar jo aa.ī to kis ko yaqīn aa.egā

maiñ jis ke maazī kā ik lamha-e-gurezāñ huuñ

ye dekhnā hai vo kaise mujhe bhulā.egā

hazār ḳhvāb haiñ in ḳhud-fareb āñkhoñ meñ

bichhaḌ ke bhī vo yahāñ se kahīñ na jā.egā

ye din bhī aa ga.e ab apne dil pe biitī huī

maiñ ḳhud kahūñgā mujhī ko yaqīñ na aa.egā

ye kya zarur hamin ko wo aazmaega

har aane wala muqaddar bhi sath laega

kise KHabar hai ki is tira-KHak-dan ke liye

hai ek dil hi to raushan so Dub jaega

khule darichon se yun jhankti hai mayusi

ki jaise ab koi jhonka idhar na aaega

udas raat ki sargoshiyon ke baad agar

sahar jo aai to kis ko yaqin aaega

main jis ke mazi ka ek lamha-e-gurezan hun

ye dekhna hai wo kaise mujhe bhulaega

hazar KHwab hain in KHud-fareb aankhon mein

bichhaD ke bhi wo yahan se kahin na jaega

ye din bhi aa gae ab apne dil pe biti hui

main KHud kahunga mujhi ko yaqin na aaega