ye kyon kahun ki unhen haal-e-dil suna na saka

ye kyoñ kahūñ ki unheñ hāl-e-dil sunā na sakā

nazar meñ thā vo fasāna jo lab tak aa na sakā

mujhe kabhī ḳhalish-e-dil kā lutf aa na sakā

nazar uThī bhī to un se nazar milā na sakā

gunāhgār-e-mohabbat ko sab ne baḳhsh diyā

ki ye gunāh kisī kī samajh meñ aa na sakā

mire ḳhayāl meñ taḳhlīq-e-dil kā raaz ye hai

ki ishq vus.at-e-kaunain meñ samā na sakā

tirī talāsh meñ niklā hai dekhte kyā ho

vo bad-nasīb jo apnā surāġh pā na sakā

vahī nazar hai vahī dil vahī tamannā.eñ

jahān-e-ishq ko ḳhud ishq bhī miTā na sakā

vahī fasāna-e-dil hai vahī hikāyat-e-shauq

jise vo sun na sake aur maiñ sunā na sakā

baḌī kashish hai tire sang-e-dar meñ mere liye

sar-e-niyāz uThāyā to dil uThā na sakā

ye dil hai aur ye jān-e-hazīñ qusūr muaaf

tirī nazar kā taqāza samajh meñ aa na sakā

mujhe to hashr tak us kī najāt meñ shak hai

gunāh-e-ishq jise aadmī banā na sakā

ye ishq hai ki junūñ iztirāb hai ki sukūñ

maiñ dil ko bhuul gayā dil tujhe bhulā na sakā

yaqīn thā shab-e-va.ada zarūr aaoge tum

sahar tak ek sitāra bhī jhilmilā na sakā

tirā karam ki mujhe soz-e-zindagī baḳhshā

mirī ḳhatā ki use zindagī banā na sakā

fareb-e-ishq ne āñkheñ sī khol diiñ 'shāhid'

maiñ us ke ba.ad kisī kā fareb khā na sakā

ye kyon kahun ki unhen haal-e-dil suna na saka

nazar mein tha wo fasana jo lab tak aa na saka

mujhe kabhi KHalish-e-dil ka lutf aa na saka

nazar uThi bhi to un se nazar mila na saka

gunahgar-e-mohabbat ko sab ne baKHsh diya

ki ye gunah kisi ki samajh mein aa na saka

mere KHayal mein taKHliq-e-dil ka raaz ye hai

ki ishq wusat-e-kaunain mein sama na saka

teri talash mein nikla hai dekhte kya ho

wo bad-nasib jo apna suragh pa na saka

wahi nazar hai wahi dil wahi tamannaen

jahan-e-ishq ko KHud ishq bhi miTa na saka

wahi fasana-e-dil hai wahi hikayat-e-shauq

jise wo sun na sake aur main suna na saka

baDi kashish hai tere sang-e-dar mein mere liye

sar-e-niyaz uThaya to dil uTha na saka

ye dil hai aur ye jaan-e-hazin qusur muaf

teri nazar ka taqaza samajh mein aa na saka

mujhe to hashr tak us ki najat mein shak hai

gunah-e-ishq jise aadmi bana na saka

ye ishq hai ki junun iztirab hai ki sukun

main dil ko bhul gaya dil tujhe bhula na saka

yaqin tha shab-e-wada zarur aaoge tum

sahar tak ek sitara bhi jhilmila na saka

tera karam ki mujhe soz-e-zindagi baKHsha

meri KHata ki use zindagi bana na saka

fareb-e-ishq ne aankhen si khol din 'shahid'

main us ke baad kisi ka fareb kha na saka