ye kyon sochen ki wo dad-e-wafa dete to kya hota

ye kyoñ socheñ ki vo dād-e-vafā dete to kyā hotā

jo rone par bhī pābandī lagā dete to kyā hotā

lagā rakhī hai dil meñ aag un kī be-niyāzī ne

na jaane jo vo dāman se havā dete to kyā hotā

taḌapne kī ijāzat hai ye un kī mehrbānī hai

vo hañs kar Taal jaate haiñ sazā dete to kyā hotā

faqat kuchh daaġh siine meñ chhupā laa.e haiñ dīvāne

ye pūñjī bhī jo rāhoñ meñ luTā dete to kyā hotā

baḌe kāyāñ haiñ jin kā naam ham ne shaiḳh rakhā hai

ye gaalī vo bhī ham ko barmalā dete to kyā hotā

bahut achchhā huā mahfil se uTh ke chal diye 'sābir'

bhare baiThe the koī gul khilā dete to kyā hotā

ye kyon sochen ki wo dad-e-wafa dete to kya hota

jo rone par bhi pabandi laga dete to kya hota

laga rakhi hai dil mein aag un ki be-niyazi ne

na jaane jo wo daman se hawa dete to kya hota

taDapne ki ijazat hai ye un ki mehrbani hai

wo hans kar Tal jate hain saza dete to kya hota

faqat kuchh dagh sine mein chhupa lae hain diwane

ye punji bhi jo rahon mein luTa dete to kya hota

baDe kayan hain jin ka nam hum ne shaiKH rakha hai

ye gali wo bhi hum ko barmala dete to kya hota

bahut achchha hua mahfil se uTh ke chal diye 'sabir'

bhare baiThe the koi gul khila dete to kya hota