ye lau kaisi hai jo ek sans bhi maddham nahin hoti

ye lau kaisī hai jo ik saañs bhī maddham nahīñ hotī

bhulāne par bhī zālim yaad us kī kam nahīñ hotī

ye matlab-āshnā duniyā ye zālim bevafā duniyā

sharīk-e-aish kar liije sharīk-e-ġham nahīñ hotī

adam ke jaane vaale qāfile din-rāt chalte haiñ

magar is anjuman kī dilkashī kuchh kam nahīñ hotī

na pūchh ai ham-nashīñ rūdād-hā-e-shām-e-ġham ham se

qayāmat kī sahar hotī hai shām-e-ġham nahīñ hotī

bhulāyā hai mujhe tū ne tirī barham-mizājī ne

magar bedard terī yaad phir bhī kam nahīñ hotī

nahīñ vāqif tū ai dil ātish-e-soz-e-mohabbat se

ye daulat jis qadar aatī hai ghar meñ kam nahīñ hotī

'safīr' ab tak to rūdād-e-mohabbat ḳhaam hai terī

abhī to aañkh bhī fart-e-alam se nam nahīñ hotī

ye lau kaisi hai jo ek sans bhi maddham nahin hoti

bhulane par bhi zalim yaad us ki kam nahin hoti

ye matlab-ashna duniya ye zalim bewafa duniya

sharik-e-aish kar lije sharik-e-gham nahin hoti

adam ke jaane wale qafile din-raat chalte hain

magar is anjuman ki dilkashi kuchh kam nahin hoti

na puchh ai ham-nashin rudad-ha-e-sham-e-gham hum se

qayamat ki sahar hoti hai sham-e-gham nahin hoti

bhulaya hai mujhe tu ne teri barham-mizaji ne

magar bedard teri yaad phir bhi kam nahin hoti

nahin waqif tu ai dil aatish-e-soz-e-mohabbat se

ye daulat jis qadar aati hai ghar mein kam nahin hoti

'safir' ab tak to rudad-e-mohabbat KHam hai teri

abhi to aankh bhi fart-e-alam se nam nahin hoti