ye le de ke jine ka hasil hai goya

ye le de ke jiine kā hāsil hai goyā

na kuchh ham ne paayā na kuchh ham ne khoyā

kuchh is darja mānūs-e-ġham ho chukā huuñ

vufūr-e-masarrat meñ ghabrā ke royā

kiye hī kā phal hai ḳhushī ho ki ġham ho

vahī aaj kaaTā jo kal ham ne boyā

koī apne dāman ke dhotā hai dhabbe

yahāñ ham ne dāman se bhī haath dhoyā

uḌaa.e to dushman ne auroñ pe chhīñTe

magar apne dāman kā dhabba na dhoyā

mirī ġhaflatoñ par bhī rahmat hai us kī

mire saath merā muqaddar na soyā

'mubārak' ko tum ne to dekhā hī hogā

vo ghabrāyā-ghabrāyā vo khoyā-khoyā

ye le de ke jine ka hasil hai goya

na kuchh hum ne paya na kuchh hum ne khoya

kuchh is darja manus-e-gham ho chuka hun

wufur-e-masarrat mein ghabra ke roya

kiye hi ka phal hai KHushi ho ki gham ho

wahi aaj kaTa jo kal hum ne boya

koi apne daman ke dhota hai dhabbe

yahan hum ne daman se bhi hath dhoya

uDae to dushman ne auron pe chhinTe

magar apne daman ka dhabba na dhoya

meri ghaflaton par bhi rahmat hai us ki

mere sath mera muqaddar na soya

'mubarak' ko tum ne to dekha hi hoga

wo ghabraya-ghabraya wo khoya-khoya