ye mana chashm-e-nam se qafile ashkon ke tar nikle

ye maanā chashm-e-nam se qāfile ashkoñ ke tar nikle

maza tab hai ki ashkoñ kī jagah ḳhūn-e-jigar nikle

banāyā thā jinheñ hamrāz ham ne dil kī dhaḌkan kā

vo farzāne ḳhud apnī āgahī se be-ḳhabar nikle

faqīh-e-shahr ko samjhā thā ham ne bhole-bhāle haiñ

magar qad se kahīñ do-chār gaz vo beshtar nikle

raqīboñ ke nishāne se fasīl-e-ishq kyā girtī

hasīnoñ ke magar kuchh vaar āḳhir kārgar nikle

Duboyā nā-ḳhudāoñ ne safīna mil ke ummat kā

qadam do-chār aage rahzanoñ se rāhbar nikle

ishāra terī nazroñ kā bhī thā lekin sar-e-mahshar

sabhī ilzām ai rashk-e-qamar mere hī sar nikle

chalo ham hī nikal jā.eñge misl-e-ḳhār gulshan se

kisī sūrat tirī hasrat bhī ai bedād-gar nikle

hamāre ishq ko ab aazmā le jis kā jī chāhe

kafan-bardosh maqtal meñ tire shorīda-sar nikle

usī ke husn-e-be-parvā ko detā huuñ duā.eñ 'shaiḳh'

ki jis ke faiz se merī ġhazal ke bāl-o-par nikle

ye mana chashm-e-nam se qafile ashkon ke tar nikle

maza tab hai ki ashkon ki jagah KHun-e-jigar nikle

banaya tha jinhen hamraaz hum ne dil ki dhaDkan ka

wo farzane KHud apni aagahi se be-KHabar nikle

faqih-e-shahr ko samjha tha hum ne bhole-bhaale hain

magar qad se kahin do-chaar gaz wo beshtar nikle

raqibon ke nishane se fasil-e-ishq kya girti

hasinon ke magar kuchh war aaKHir kargar nikle

Duboya na-KHudaon ne safina mil ke ummat ka

qadam do-chaar aage rahzanon se rahbar nikle

ishaara teri nazron ka bhi tha lekin sar-e-mahshar

sabhi ilzam ai rashk-e-qamar mere hi sar nikle

chalo hum hi nikal jaenge misl-e-KHar gulshan se

kisi surat teri hasrat bhi ai bedad-gar nikle

hamare ishq ko ab aazma le jis ka ji chahe

kafan-bardosh maqtal mein tere shorida-sar nikle

usi ke husn-e-be-parwa ko deta hun duaen 'shaiKH'

ki jis ke faiz se meri ghazal ke baal-o-par nikle