ye mai-kashi ka sabaq hai nae nisab ke sath

ye mai-kashī kā sabaq hai na.e nisāb ke saath

ki ḳhūn-e-dil hameñ piinā hai ab sharāb ke saath

bas is yaqīn pe hotī haiñ laġhzisheñ aksar

ki rahmatoñ kā bhī daatā hai tū azaab ke saath

ye qurbatoñ kā ishāra hai yā judā.ī kā

jo zard phuul milā hai tire javāb ke saath

zarā vo saath bhī chalte haiñ lauT jaate haiñ

hijāb TuuT rahe haiñ magar hijāb ke saath

kahīñ hai tañgī subū kī kahīñ farāvānī

to phir giraft bhī maulā usī hisāb ke saath

agar raqīb nahīñ hai to kaun hai vo shaḳhs

dikhā.ī detā hai jo āj-kal janāb ke saath

ḳhayāl-e-sūd-o-ziyāñ aur husūl-e-manzil-e-ishq

zavāl-e-umr meñ jaise koī shabāb ke saath

faqat yuuñ shor machāne kā fā.eda kyā hai

sazā bhī denā zarūrī hai ehtisāb ke saath

hamāre ho to zarā khul ke e'timād karo

nayā savāl uThāte ho kyuuñ javāb ke saath

ye apne aap ko paanā hai tujh ko khonā kyuuñ

tamām umr kaTī hai is iztirāb ke saath

ye sab ġhurūb ke āsār haiñ ayaañ 'ādil'

ki saa.e baḌhne lage Dhalte āftāb ke saath

ye mai-kashi ka sabaq hai nae nisab ke sath

ki KHun-e-dil hamein pina hai ab sharab ke sath

bas is yaqin pe hoti hain laghzishen aksar

ki rahmaton ka bhi data hai tu azab ke sath

ye qurbaton ka ishaara hai ya judai ka

jo zard phul mila hai tere jawab ke sath

zara wo sath bhi chalte hain lauT jate hain

hijab TuT rahe hain magar hijab ke sath

kahin hai tangi subu ki kahin farawani

to phir giraft bhi maula usi hisab ke sath

agar raqib nahin hai to kaun hai wo shaKHs

dikhai deta hai jo aaj-kal janab ke sath

KHayal-e-sud-o-ziyan aur husul-e-manzil-e-ishq

zawal-e-umr mein jaise koi shabab ke sath

faqat yun shor machane ka faeda kya hai

saza bhi dena zaruri hai ehtisab ke sath

hamare ho to zara khul ke e'timad karo

naya sawal uThate ho kyun jawab ke sath

ye apne aap ko pana hai tujh ko khona kyun

tamam umr kaTi hai is iztirab ke sath

ye sab ghurub ke aasar hain ayan 'adil'

ki sae baDhne lage Dhalte aaftab ke sath