ye maslahat hai haqiqat ko KHwab likhna hai

ye maslahat hai haqīqat ko ḳhvāb likhnā hai

ruḳh-e-siyah ko yahāñ āftāb likhnā hai

mahak rahī haiñ ka.ī jin meñ phuul kī yādeñ

mujhe kuchh aise ḳhatoñ ke javāb likhnā hai

zalīl-o-ḳhvār the kal tak jo vaqt ke hāthoñ

ye hukm hai unheñ izzat-ma.āb likhnā hai

sadī ke chehre pe bikhrā hai jo lahū apnā

isī lahū se mujhe inqalāb likhnā hai

lage haiñ daaġh jo insāniyat ke dāman par

jabīn-e-vaqt pe un kā hisāb likhnā hai

kabhī jo dekhā thā merī udaas āñkhoñ ne

tumhāre naam vahī ek ḳhvāb likhnā hai

charāġh-e-fikr se 'irfān' raushnī le kar

kitāb-e-shab kā mujhe intisāb likhnā hai

ye maslahat hai haqiqat ko KHwab likhna hai

ruKH-e-siyah ko yahan aaftab likhna hai

mahak rahi hain kai jin mein phul ki yaaden

mujhe kuchh aise KHaton ke jawab likhna hai

zalil-o-KHwar the kal tak jo waqt ke hathon

ye hukm hai unhen izzat-maab likhna hai

sadi ke chehre pe bikhra hai jo lahu apna

isi lahu se mujhe inqalab likhna hai

lage hain dagh jo insaniyat ke daman par

jabin-e-waqt pe un ka hisab likhna hai

kabhi jo dekha tha meri udas aankhon ne

tumhaare nam wahi ek KHwab likhna hai

charagh-e-fikr se 'irfan' raushni le kar

kitab-e-shab ka mujhe intisab likhna hai