ye mat socho thoDe se kya banta hai

ye mat socho thoḌe se kyā bantā hai

qatra qatra mil ke dariyā bantā hai

paude jaisā is ko sīñchnā paḌtā hai

aise thoḌī rishta gahrā bantā hai

kitne ḳhāke zehn meñ bante miTte haiñ

tab jā kar dhuñdlā sā chehra bantā hai

dekh kisī se koī bhī ummīd na rakh

is duniyā meñ kaun kisī kā bantā hai

sur se taal mile to lai ban jaatī hai

dil ke taar chhiḌeñ to naġhma bantā hai

bālīñ jab gandum kī puurī pak jaa.eñ

tab khetoñ kā rang sunahrā bantā hai

logoñ ko aksar ye kahte suntī huuñ

mar jaa.e insān to taara bantā hai

rishte jab saḌ jaa.eñ to badbū dete haiñ

mar jaa.eñ to un kā lāsha bantā hai

ghar ke andar aa kar us ko dekh zarā

logoñ ke aage jo achchhā bantā hai

ashkoñ se jab āñkheñ ḳhālī ho jaa.eñ

āñkhoñ kā dariyā tab sahrā bantā hai

sabr kā 'azrā' jab paimāna bhar jaa.e

chingārī se ġhussa sho'la bantā hai

ye mat socho thoDe se kya banta hai

qatra qatra mil ke dariya banta hai

paude jaisa is ko sinchna paDta hai

aise thoDi rishta gahra banta hai

kitne KHake zehn mein bante miTte hain

tab ja kar dhundla sa chehra banta hai

dekh kisi se koi bhi ummid na rakh

is duniya mein kaun kisi ka banta hai

sur se tal mile to lai ban jati hai

dil ke tar chhiDen to naghma banta hai

baalin jab gandum ki puri pak jaen

tab kheton ka rang sunahra banta hai

logon ko aksar ye kahte sunti hun

mar jae insan to tara banta hai

rishte jab saD jaen to badbu dete hain

mar jaen to un ka lasha banta hai

ghar ke andar aa kar us ko dekh zara

logon ke aage jo achchha banta hai

ashkon se jab aankhen KHali ho jaen

aankhon ka dariya tab sahra banta hai

sabr ka 'azra' jab paimana bhar jae

chingari se ghussa sho'la banta hai