ye mazahir dekh kar iman se bhar jata hun main

ye mazāhir dekh kar īmāñ se bhar jaatā huuñ maiñ

aise uThtā hai yaqīñ ḳhud se ki Dar jaatā huuñ maiñ

rang huuñ aur āmad-o-raft-e-suḳhan apnī mirī

vaqt par aatā huuñ apne vaqt par jaatā huuñ maiñ

ḳhvāb huuñ aur sāmne aatā huuñ nīñdoñ meñ faqat

dekh tere baḳht se ai kārīgar jaatā huuñ maiñ

ye kuaañ hai ThanDe paanī kā baḌī shahrāh par

roz ho jaatā huuñ ḳhālī roz bhar jaatā huuñ maiñ

khīñch laatā huuñ kisī taht-us-sarā se apnā aap

puurī duniyā par chamaktā huuñ utar jaatā huuñ maiñ

jaise chashma phuuT paḌtā hai pahāḌoñ se ma'an

jaise dariyāoñ kā dhārā huuñ utar jaatā huuñ maiñ

ek tūfān-e-ziyā huuñ andhe ho jaate haiñ log

ek sailāb-e-balā huuñ jis ke ghar jaatā huuñ maiñ

abr huuñ aur jam' hotā huuñ chhatoñ ke vāste

ik havā huuñ aur shahroñ se guzar jaatā huuñ maiñ

apnī apnī bāriyāñ haiñ apnā apnā vaqt hai

ai mirī rau ruk yahāñ par ai hunar jaatā huuñ maiñ

ye mazahir dekh kar iman se bhar jata hun main

aise uThta hai yaqin KHud se ki Dar jata hun main

rang hun aur aamad-o-raft-e-suKHan apni meri

waqt par aata hun apne waqt par jata hun main

KHwab hun aur samne aata hun nindon mein faqat

dekh tere baKHt se ai karigar jata hun main

ye kuan hai ThanDe pani ka baDi shahrah par

roz ho jata hun KHali roz bhar jata hun main

khinch lata hun kisi taht-us-sara se apna aap

puri duniya par chamakta hun utar jata hun main

jaise chashma phuT paDta hai pahaDon se ma'an

jaise dariyaon ka dhaara hun utar jata hun main

ek tufan-e-ziya hun andhe ho jate hain log

ek sailab-e-bala hun jis ke ghar jata hun main

abr hun aur jam' hota hun chhaton ke waste

ek hawa hun aur shahron se guzar jata hun main

apni apni bariyan hain apna apna waqt hai

ai meri rau ruk yahan par ai hunar jata hun main