ye mera mazaq-e-mohabbat nahin hai

ye merā mazāq-e-mohabbat nahīñ hai

maiñ kaise kahūñ ġham meñ rāhat nahīñ hai

ye kyā kah gayā ujlat-e-arz-e-ġham meñ

mujhe tum se koī shikāyat nahīñ hai

mohabbat samajh kī hadoñ se hai bāhar

samajh meñ jo aa.e mohabbat nahīñ hai

pashemāniyāñ haiñ fusūñ-kāriyāñ haiñ

in āñkhoñ meñ sab hai muravvat nahīñ hai

ġham-e-dil kahā tum se apnā samajh kar

shikāyat na samjho shikāyat nahīñ hai

samajh lo use ek sāz-e-shikasta

ki jis dil meñ dard-e-mohabbat nahīñ hai

na chhalke tirā aks-e-tasvīr jin meñ

un ashkoñ se dāman kī zīnat nahīñ hai

unheñ 'shauq' apnā ġham-e-dil sunā de

koī aur rāhat kī sūrat nahīñ hai

ye mera mazaq-e-mohabbat nahin hai

main kaise kahun gham mein rahat nahin hai

ye kya kah gaya ujlat-e-arz-e-gham mein

mujhe tum se koi shikayat nahin hai

mohabbat samajh ki hadon se hai bahar

samajh mein jo aae mohabbat nahin hai

pashemaniyan hain fusun-kariyan hain

in aankhon mein sab hai murawwat nahin hai

gham-e-dil kaha tum se apna samajh kar

shikayat na samjho shikayat nahin hai

samajh lo use ek saz-e-shikasta

ki jis dil mein dard-e-mohabbat nahin hai

na chhalke tera aks-e-taswir jin mein

un ashkon se daman ki zinat nahin hai

unhen 'shauq' apna gham-e-dil suna de

koi aur rahat ki surat nahin hai