ye meri basti mein kya hua hai

ye merī bastī meñ kyā huā hai

jise bhī dekho Darā huā hai

hamāre is ḳhāna-e-alam meñ

jo hai vo terā diyā huā hai

'alam hamārā girā nahīñ hai

'alam hamārā uThā huā hai

mirī tirī be-ta’alluqī meñ

'ajab ta'alluq banā huā hai

sab us ke Tāñke udhaḌ ga.e haiñ

ye zaḳhm kis kā siyā huā hai

ham aaj kyā uTh ga.e haiñ jaldī

ki aaj sūraj chhupā huā hai

kabhī to aao ki ghar hamārā

tumhāre ghar se milā huā hai

maiñ apnī zid par DaTā huā huuñ

vo apnī haT par aḌā huā hai

Dhalegā din to ġhurūb hogā

abhī jo sūraj chaḌhā huā hai

jo mai-kade meñ na.e haiñ un ko

zarā sī pī kar nasha huā hai

jabīneñ un kī ghisī huī haiñ

jinheñ ye ḳhil'at 'atā huā hai

haiñ phuul zaḳhmoñ ke har shajar par

chaman hamārā khilā huā hai

tumhārī yādoñ kī ḳhushbuoñ se

badan hamārā basā huā hai

na jaane kal bastiyoñ meñ kyā ho

abhī to ḳhatra Talā huā hai

kahāñ hamārī hai jeb ḳhālī

ḳhudī kā sikka paḌā huā hai

ġhazal ye kaisī kahī hai tum ne

jo she'r hai vo Dhalā huā hai

ye meri basti mein kya hua hai

jise bhi dekho Dara hua hai

hamare is KHana-e-alam mein

jo hai wo tera diya hua hai

'alam hamara gira nahin hai

'alam hamara uTha hua hai

meri teri be-ta’alluqi mein

'ajab ta'alluq bana hua hai

sab us ke Tanke udhaD gae hain

ye zaKHm kis ka siya hua hai

hum aaj kya uTh gae hain jaldi

ki aaj suraj chhupa hua hai

kabhi to aao ki ghar hamara

tumhaare ghar se mila hua hai

main apni zid par DaTa hua hun

wo apni haT par aDa hua hai

Dhalega din to ghurub hoga

abhi jo suraj chaDha hua hai

jo mai-kade mein nae hain un ko

zara si pi kar nasha hua hai

jabinen un ki ghisi hui hain

jinhen ye KHil'at 'ata hua hai

hain phul zaKHmon ke har shajar par

chaman hamara khila hua hai

tumhaari yaadon ki KHushbuon se

badan hamara basa hua hai

na jaane kal bastiyon mein kya ho

abhi to KHatra Tala hua hai

kahan hamari hai jeb KHali

KHudi ka sikka paDa hua hai

ghazal ye kaisi kahi hai tum ne

jo she'r hai wo Dhala hua hai