ye mohabbat hai ise garmi-e-bazar na kar

ye mohabbat hai ise garmī-e-bāzār na kar

laakh vahshat sahī aisā to mire yaar na kar

aaj ye soch ki kal kaise sambhālegā ise

be-sabab dil meñ gumānoñ kā ye ambār na kar

ziist har aan taġhayyur kā nishāñ hai lekin

yaar kal tak jo rahe aaj unheñ aġhyār na kar

in badalte hue rañgoñ ke tamāshe pe na jā

ye jo duniyā hai to apnā ise me.aar na kar

mas.ala hal bhī to ho saktā hai kuchh soch ke dekh

yuuñ bigaḌ kar mirī har baat se inkār na kar

maiñ tujhe rok nahīñ saktā magar jaate hue

ye jo imkān kā dar hai ise dīvār na kar

dostī ḳhatm huī saaf batā de mujh ko

kam se kam yuuñ kisī dushman kī tarah vaar na kar

ye mohabbat hai ise garmi-e-bazar na kar

lakh wahshat sahi aisa to mere yar na kar

aaj ye soch ki kal kaise sambhaalega ise

be-sabab dil mein gumanon ka ye ambar na kar

zist har aan taghayyur ka nishan hai lekin

yar kal tak jo rahe aaj unhen aghyar na kar

in badalte hue rangon ke tamashe pe na ja

ye jo duniya hai to apna ise mear na kar

masala hal bhi to ho sakta hai kuchh soch ke dekh

yun bigaD kar meri har baat se inkar na kar

main tujhe rok nahin sakta magar jate hue

ye jo imkan ka dar hai ise diwar na kar

dosti KHatm hui saf bata de mujh ko

kam se kam yun kisi dushman ki tarah war na kar