ye mohabbat ka sila tha ishq ka anjam tha

ye mohabbat kā sila thā ishq kā anjām thā

phuul kā hañsnā hī us kī maut kā paiġhām thā

ġham na dete aap to rāhat se kis ko kaam thā

zindagī kī gardishoñ ke saath daur-e-jām thā

Thokareñ khāte ga.e lab par tumhārā naam thā

hashr kā manzar thā rāh-e-ishq meñ jo gaam thā

aap kyuuñ aañsū bahā.eñ mere hāl-e-zār par

ishq kā niklā vahī anjām jo anjām thā

ban gayā har saañs qātil rañj hai to bas yahī

zindagī ne maar Daalā maut par ilzām thā

thā tumhāre sāmne be-kaif rañg-e-gulistāñ

dīda-e-nargis to kahne ko chhalaktā jaam thā

dekhne vaale kaheñge merī barbādī kā haal

āshiyāna jal rahā thā maiñ asīr-e-dām thā

girya-e-shabnam se aatī hai guloñ meñ tāzgī

merā ronā bhī kisī ke aish kā paiġhām thā

barq ke kyā haath aayā kyā milā sayyād ko

chaar tinkoñ ke na rahne se chaman badnām thā

jalne vaalā hī samajh saktā hai dil kī aag ko

hijr meñ 'ārif' mirā hamdam charāġh-e-shām thā

ye mohabbat ka sila tha ishq ka anjam tha

phul ka hansna hi us ki maut ka paigham tha

gham na dete aap to rahat se kis ko kaam tha

zindagi ki gardishon ke sath daur-e-jam tha

Thokaren khate gae lab par tumhaara nam tha

hashr ka manzar tha rah-e-ishq mein jo gam tha

aap kyun aansu bahaen mere haal-e-zar par

ishq ka nikla wahi anjam jo anjam tha

ban gaya har sans qatil ranj hai to bas yahi

zindagi ne mar Dala maut par ilzam tha

tha tumhaare samne be-kaif rang-e-gulistan

dida-e-nargis to kahne ko chhalakta jam tha

dekhne wale kahenge meri barbaadi ka haal

aashiyana jal raha tha main asir-e-dam tha

girya-e-shabnam se aati hai gulon mein tazgi

mera rona bhi kisi ke aish ka paigham tha

barq ke kya hath aaya kya mila sayyaad ko

chaar tinkon ke na rahne se chaman badnam tha

jalne wala hi samajh sakta hai dil ki aag ko

hijr mein 'arif' mera hamdam charagh-e-sham tha