ye mulaqat na Talunga chala aaunga

ye mulāqāt na Tālūñgā chalā ā.ūñgā

koī tarkīb nikālūñgā chalā ā.ūñgā

dil abhī tum se mulāqāt ko tayyār nahīñ

jaise hī dil ko manā lūñgā chalā ā.ūñgā

ab nahīñ maiñ vo jise tum ne kabhī chāhā thā

ḳhud ko us shakl meñ Dhālūñgā chalā ā.ūñgā

sochtā huuñ maiñ ki aanā koī mushkil bhī nahīñ

ik bahānā hī banā lūñgā chalā ā.ūñgā

ab bhī lagtā hai ki tum mere nahīñ ho kāmil

jab tumheñ apnā banā lūñgā chalā ā.ūñgā

merī taqdīr abhī mujh se ḳhafā hai jānāñ

rūThī taqdīr manā lūñgā chalā ā.ūñgā

muntazir huuñ ye kaho tum ki abhī aa jaao

vaqt se haath milā lūñgā chalā ā.ūñgā

koī ummīd nahīñ koī tavaqqo' bhī nahīñ

ab to bas nām-e-ḳhudā lūñgā chalā ā.ūñgā

ye mulaqat na Talunga chala aaunga

koi tarkib nikalunga chala aaunga

dil abhi tum se mulaqat ko tayyar nahin

jaise hi dil ko mana lunga chala aaunga

ab nahin main wo jise tum ne kabhi chaha tha

KHud ko us shakl mein Dhaalunga chala aaunga

sochta hun main ki aana koi mushkil bhi nahin

ek bahana hi bana lunga chala aaunga

ab bhi lagta hai ki tum mere nahin ho kaamil

jab tumhein apna bana lunga chala aaunga

meri taqdir abhi mujh se KHafa hai jaanan

ruThi taqdir mana lunga chala aaunga

muntazir hun ye kaho tum ki abhi aa jao

waqt se hath mila lunga chala aaunga

koi ummid nahin koi tawaqqo' bhi nahin

ab to bas nam-e-KHuda lunga chala aaunga