ye mumkin hai ki yun humne tumhein aksar rulaya ho

ye mumkin hai ki yuuñ ham ne tumheñ aksar rulāyā ho

magar ye bhī to hai tum ne hameñ aksar satāyā ho

bigaḌtī baat hai jab jab mujhe yuuñ kostī ho tum

ki jaise zindagī kā har sitam mujh se hī paayā ho

har ik golī tamanche se nikal kar sochtī hogī

agar lenī hī haiñ jāneñ to kyoñ apnā parāyā ho

hamāre qabr par aksar sulagtī dhuup rahtī hai

jo zinda the to chāhā thā tirī zulfoñ kā saaya ho

tirī āñkhoñ kī vus.at meñ bharī ho kahkashāñ shāyad

tirī nāzuk sī palkoñ ne falak shāyad uThāyā ho

hamārī ḳhaak uḌ kar shāḳh se kartī hai sargoshī

uThā lo phuul ye shāyad havā ne hī girāyā ho

mulāqāteñ to hotī haiñ magar puurī nahīñ hotī

ki jaise niiñd meñ gahrī adhūrā ḳhvāb aayā ho

huī hai aaj be-parda tirī ye be-ruḳhī kuchh yuuñ

mire hālāt ne ruḳh se tire parda haTāyā ho

lipaT kar aag se dekho 'alaḳh' kī laash jaltī hai

kisī hamdard ne aa kar jo siine se lagāyā ho

ye mumkin hai ki yun hum ne tumhein aksar rulaya ho

magar ye bhi to hai tum ne hamein aksar sataya ho

bigaDti baat hai jab jab mujhe yun kosti ho tum

ki jaise zindagi ka har sitam mujh se hi paya ho

har ek goli tamanche se nikal kar sochti hogi

agar leni hi hain jaanen to kyon apna paraya ho

hamare qabr par aksar sulagti dhup rahti hai

jo zinda the to chaha tha teri zulfon ka saya ho

teri aankhon ki wusat mein bhari ho kahkashan shayad

teri nazuk si palkon ne falak shayad uThaya ho

hamari KHak uD kar shaKH se karti hai sargoshi

uTha lo phul ye shayad hawa ne hi giraya ho

mulaqaten to hoti hain magar puri nahin hoti

ki jaise nind mein gahri adhura KHwab aaya ho

hui hai aaj be-parda teri ye be-ruKHi kuchh yun

mere haalat ne ruKH se tere parda haTaya ho

lipaT kar aag se dekho 'alaKH' ki lash jalti hai

kisi hamdard ne aa kar jo sine se lagaya ho