ye na samjho ki faqat hai dil ke bahlane ka nam

ye na samjho ki faqat hai dil ke bahlāne kā naam

āshiqī hai ishq meñ had se guzar jaane kā naam

chaar din kī zindagī apne liye kaafī nahīñ

aur kuchh lamhoñ pe likh de apne mastāne kā naam

ġharq kar de mujh ko apnī chāhatoñ kī jhiil meñ

sham.a tū hai to miTā de apne parvāne kā naam

yuuñ dabe paañv na mere ghar meñ aayā kījiye

varna phir badnām ho jā.egā dīvāne kā naam

un ke andāz-e-mohabbat par nazar to Dāliye

ḳhat mujhe vo bhejte haiñ likh ke begāne kā naam

sirf sajdoñ se mukammal bandagī hotī nahīñ

bandagī hai rab ke jalve sāmne aane kā naam

chhū nahīñ saktī gunahgāroñ ko us kī uñgliyāñ

hai siyāsat be-gunāhoñ par sitam Dhāne kā naam

zindagī kī uljhanoñ ko taaq par rakh dījiye

zindagī hai dil kī dhaḌkan tez ho jaane kā naam

haañ zarā 'ḳhurshīd' in nādāñ parindoñ se to pūchh

kyoñ nahīñ lete haiñ vo pardes se aane kā naam

ye na samjho ki faqat hai dil ke bahlane ka nam

aashiqi hai ishq mein had se guzar jaane ka nam

chaar din ki zindagi apne liye kafi nahin

aur kuchh lamhon pe likh de apne mastane ka nam

gharq kar de mujh ko apni chahaton ki jhil mein

shama tu hai to miTa de apne parwane ka nam

yun dabe panw na mere ghar mein aaya kijiye

warna phir badnam ho jaega diwane ka nam

un ke andaz-e-mohabbat par nazar to Daliye

KHat mujhe wo bhejte hain likh ke begane ka nam

sirf sajdon se mukammal bandagi hoti nahin

bandagi hai rab ke jalwe samne aane ka nam

chhu nahin sakti gunahgaron ko us ki ungliyan

hai siyasat be-gunahon par sitam Dhane ka nam

zindagi ki uljhanon ko taq par rakh dijiye

zindagi hai dil ki dhaDkan tez ho jaane ka nam

han zara 'KHurshid' in nadan parindon se to puchh

kyon nahin lete hain wo pardes se aane ka nam