ye nafraton ka sulagta alaw kaisa hai

ye nafratoñ kā sulagtā alaav kaisā hai

ye kārvān-e-sahar kā paḌāv kaisā hai

lahūluhān hai peshānī-e-sabā kyūñkar

badan pe ahl-e-gulistāñ ke ghaav kaisā hai

mohabbatoñ kī ravish meñ bapā hai raqs-e-sharar

ye shahr-e-ishq vafā meñ tanāv kaisā hai

matā-e-dard ki hai apnā mushtarak virsa

miyān-e-ham-nafasāñ bhed-bhāv kaisā hai

simaT rahe haiñ ujāle ufuq kī bāñhoñ meñ

añdherī raat kā ye chal-chalāv kaisā hai

na ḳhauf-e-kam-nigahī hai na ḳhadsha-e-shab-ḳhūñ

shu.ūr-e-jihat se aarī bahāv kaisā hai

salīb-o-dār ke mausam pe guftugū na sahī

dayār-e-husn kā ab rakh-rakhāv kaisā hai

jabīn-e-fikr pe zaḳhmoñ kī kaifiyat kyā hai

hujūm-e-shauq kā aalam batāo kaisā hai

'shamīm' qīmat-e-jins-e-hayāt kyā Thahrī

lahū kā shahr-e-nigārāñ meñ bhaav kaisā hai

ye nafraton ka sulagta alaw kaisa hai

ye karwan-e-sahar ka paDaw kaisa hai

lahuluhan hai peshani-e-saba kyunkar

badan pe ahl-e-gulistan ke ghaw kaisa hai

mohabbaton ki rawish mein bapa hai raqs-e-sharar

ye shahr-e-ishq wafa mein tanaw kaisa hai

mata-e-dard ki hai apna mushtarak wirsa

miyan-e-ham-nafasan bhed-bhaw kaisa hai

simaT rahe hain ujale ufuq ki banhon mein

andheri raat ka ye chal-chalaw kaisa hai

na KHauf-e-kam-nigahi hai na KHadsha-e-shab-KHun

shuur-e-jihat se aari bahaw kaisa hai

salib-o-dar ke mausam pe guftugu na sahi

dayar-e-husn ka ab rakh-rakhaw kaisa hai

jabin-e-fikr pe zaKHmon ki kaifiyat kya hai

hujum-e-shauq ka aalam batao kaisa hai

'shamim' qimat-e-jins-e-hayat kya Thahri

lahu ka shahr-e-nigaran mein bhaw kaisa hai