ye nazm-e-gurezan hai barham-zadani pahle

ye nazm-e-gurezāñ hai barham-zadanī pahle

zāhid kī kī taraf se ho tauba-shikanī pahle

phūloñ ke tabassum par ronā abhī aatā hai

dekhī hai in āñkhoñ ne vīrāñ-chamanī pahle

yuuñ husn ke chehre par aa.ī nahīñ barnā.ī

sau shaam ke pardoñ meñ ik sub.h chhanī pahle

ma.alūm kise āḳhir is ḳhāk-e-tamannā se

parvāna uThā pahle yā sham.a banī pahle

ye aish ke hañgāme uḌte hue bādal haiñ

hotī hai nigāhoñ meñ har chhāñv ghanī pahle

ik nīm-tabassum se hotā hai chaman zinda

aisī nafasī sīkhe ġhuncha-dahanī pahle

har naġhma 'nushūr' ab bhī mamnūn-e-taġhazzul hai

sikhlā.ī ġhazal ne hī shīrīñ-suḳhanī pahle

ye nazm-e-gurezan hai barham-zadani pahle

zahid ki ki taraf se ho tauba-shikani pahle

phulon ke tabassum par rona abhi aata hai

dekhi hai in aankhon ne viran-chamani pahle

yun husn ke chehre par aai nahin barnai

sau sham ke pardon mein ek subh chhani pahle

malum kise aaKHir is KHak-e-tamanna se

parwana uTha pahle ya shama bani pahle

ye aish ke hangame uDte hue baadal hain

hoti hai nigahon mein har chhanw ghani pahle

ek nim-tabassum se hota hai chaman zinda

aisi nafasi sikhe ghuncha-dahani pahle

har naghma 'nushur' ab bhi mamnun-e-taghazzul hai

sikhlai ghazal ne hi shirin-suKHani pahle