ye nisabon mein likhi aur likhai na gai

ye nisāboñ meñ likhī aur likhā.ī na ga.ī

zindagī ham ko kitāboñ meñ paḌhā.ī na ga.ī

ek-tarfa bhī nibhāte haiñ nibhāne vaale

tujh se do-tarfa mohabbat bhī nibhā.ī na ga.ī

yuuñ mirā hāfiza kamzor bahut hai mujh se

ek laḌkī hai jo dillī kī bhulā.ī na ga.ī

us ke chehre pe numāyāñ haiñ mire hijr ke daaġh

allāh rakhe use kaise sar-e-ā.īna ga.ī

jism kī pyaas kisī taur bujhā lete haiñ

ruuh kī pyaas magar ham se bujhā.ī na ga.ī

bhuuk ugne lagī gandum kī jagah khetoñ meñ

hākim-e-vaqt tirī harza-sarā.ī na ga.ī

naqsha-e-dahr meñ do mulk haiñ aise jin meñ

muddatoñ ba.ad bhī sarhad kī laḌā.ī na ga.ī

bānū-e-shahar-e-suḳhan 'mīr' kā boyā kaaTā

tere 'hāshim' se na.ī fasl ugaa.ī na ga.ī

ye nisabon mein likhi aur likhai na gai

zindagi hum ko kitabon mein paDhai na gai

ek-tarfa bhi nibhate hain nibhane wale

tujh se do-tarfa mohabbat bhi nibhai na gai

yun mera hafiza kamzor bahut hai mujh se

ek laDki hai jo dilli ki bhulai na gai

us ke chehre pe numayan hain mere hijr ke dagh

allah rakhe use kaise sar-e-aina gai

jism ki pyas kisi taur bujha lete hain

ruh ki pyas magar hum se bujhai na gai

bhuk ugne lagi gandum ki jagah kheton mein

hakim-e-waqt teri harza-sarai na gai

naqsha-e-dahr mein do mulk hain aise jin mein

muddaton baad bhi sarhad ki laDai na gai

banu-e-shahar-e-suKHan 'mir' ka boya kaTa

tere 'hashim' se nai fasl ugai na gai