ye nukta zehn mein rakhna kisi ilzam se pahle

ye nukta zehn meñ rakhnā kisī ilzām se pahle

tumhārā naam aa.egā hamāre naam se pahle

nazar aa jā.eñge ahbāb bhī mushkil to paḌne do

nazar aate haiñ kab taare savād-e-shām se pahle

agar ai mohtasib kaTTar muvahhid ham nahīñ hote

ḳhudā kā naam kyoñ lete butoñ ke naam se pahle

yaqīnan ham unheñ pahle se baḌh kar yaad aate haiñ

jabhī to naam bhī lete haiñ ab dushnām se pahle

agar nazd-e-ḳhudā ishq-e-butāñ achchhā nahīñ hotā

na kartā ishq ko paidā ḳhudā islām se pahle

kisī bulbul se jugnū ahd-e-nau kā chal diyā kah kar

parinde lauT jaate haiñ gharoñ ko shaam se pahle

kahīñ aisā na ho ḳhauf-e-ḳhudā dil meñ samā jaa.e

jo karnā ho vo kar lo bandish-e-ehrām se pahle

butān-e-ḳhud-tarāshīda kī puujā ho bhī saktī hai

magar fatvā to le lo muftī-e-islām se pahle

tahammul nā-guzīr-e-ishq aur ham itne be-sabre

fasāna bhī nahīñ paḌhte magar anjām se pahle

koī dil toḌnā ho yā koī masjid girānā ho

kahā karte haiñ bismillāh ham har kaam se pahle

'shahāb' is daur meñ yuuñ dostoñ se ḳhauf khāte haiñ

Darā karte the jaise gardish-e-ayyām se pahle

ye nukta zehn mein rakhna kisi ilzam se pahle

tumhaara nam aaega hamare nam se pahle

nazar aa jaenge ahbab bhi mushkil to paDne do

nazar aate hain kab tare sawad-e-sham se pahle

agar ai mohtasib kaTTar muwahhid hum nahin hote

KHuda ka nam kyon lete buton ke nam se pahle

yaqinan hum unhen pahle se baDh kar yaad aate hain

jabhi to nam bhi lete hain ab dushnam se pahle

agar nazd-e-KHuda ishq-e-butan achchha nahin hota

na karta ishq ko paida KHuda islam se pahle

kisi bulbul se jugnu ahd-e-nau ka chal diya kah kar

parinde lauT jate hain gharon ko sham se pahle

kahin aisa na ho KHauf-e-KHuda dil mein sama jae

jo karna ho wo kar lo bandish-e-ehram se pahle

butan-e-KHud-tarashida ki puja ho bhi sakti hai

magar fatwa to le lo mufti-e-islam se pahle

tahammul na-guzir-e-ishq aur hum itne be-sabre

fasana bhi nahin paDhte magar anjam se pahle

koi dil toDna ho ya koi masjid girana ho

kaha karte hain bismillah hum har kaam se pahle

'shahab' is daur mein yun doston se KHauf khate hain

Dara karte the jaise gardish-e-ayyam se pahle