ye pani saaton ka aaine sa kyon nahin hai

ye paanī sā.atoñ kā ā.īne sā kyoñ nahīñ hai

nadī se āsmānī rang jhalkā kyoñ nahīñ hai

mirī rātoñ ko jis jugnūñ kī itnī aarzū thī

vo merī justujū meñ jaltā bujhtā kyoñ nahīñ hai

maiñ muḌne dūñgī us ko ajnabī manzil kī jānib

vo mere ḳhuun meñ bahtā hai merā kyoñ nahīñ hai

ta'ajjub hai ki maiñ raste banāne meñ lagī huuñ

vo dariyā hai to dīvāreñ girātā kyoñ nahīñ hai

ye ġham kī chaap tham jaa.e to dil se pūchhtī huuñ

ḳhushī ke ārizoñ kā rang gahrā kyoñ nahīñ hai

maiñ hañstī huuñ to aañsū khaulne lagte haiñ 'mahnāz'

ye paanī ġham ke sho.aloñ par ubaltā kyoñ nahīñ hai

ye pani saaton ka aaine sa kyon nahin hai

nadi se aasmani rang jhalka kyon nahin hai

meri raaton ko jis jugnun ki itni aarzu thi

wo meri justuju mein jalta bujhta kyon nahin hai

main muDne dungi us ko ajnabi manzil ki jaanib

wo mere KHun mein bahta hai mera kyon nahin hai

ta'ajjub hai ki main raste banane mein lagi hun

wo dariya hai to diwaren giraata kyon nahin hai

ye gham ki chap tham jae to dil se puchhti hun

KHushi ke aarizon ka rang gahra kyon nahin hai

main hansti hun to aansu khaulne lagte hain 'mahnaz'

ye pani gham ke shoalon par ubalta kyon nahin hai