ye paDaw to ek bahana tha

ye paḌāv to ik bahāna thā

ham ne raḳht-e-safar gañvānā thā

jab gayā thā tabāh kar ke mujhe

us kā andāz fātehāna thā

jis ne patthar se sāzisheñ kī thiiñ

aise shīshe ko TuuT jaanā thā

koī taaza nigāh kyā kartī

rog dil kā bahut purānā thā

zabt kī bheñT chaḌh ga.e āḳhir

ham ko nāmūs-e-ġham bachānā thā

rāsta koī to nikaltā zarūr

dhund ke paar ham ko jaanā thā

bhed ḳhud apnā ham samajh na sake

aur kis kā surāġh paanā thā

har bagūla huā rahīn-e-safar

kyā havāoñ kā tāziyāna thā

ek din be-sadā jazīroñ se

apnī jānib palaT ke aanā thā

us ne apnī hifāzatoñ ke liye

ḳhat-e-fāsil hameñ banānā thā

kyoñ savālī ho chāñd ke 'ansar'

apne ghar meñ diyā jalānā thā

ye paDaw to ek bahana tha

hum ne raKHt-e-safar ganwana tha

jab gaya tha tabah kar ke mujhe

us ka andaz fatehana tha

jis ne patthar se sazishen ki thin

aise shishe ko TuT jaana tha

koi taza nigah kya karti

rog dil ka bahut purana tha

zabt ki bhenT chaDh gae aaKHir

hum ko namus-e-gham bachana tha

rasta koi to nikalta zarur

dhund ke par hum ko jaana tha

bhed KHud apna hum samajh na sake

aur kis ka suragh pana tha

har bagula hua rahin-e-safar

kya hawaon ka taziyana tha

ek din be-sada jaziron se

apni jaanib palaT ke aana tha

us ne apni hifazaton ke liye

KHat-e-fasil hamein banana tha

kyon sawali ho chand ke 'ansar'

apne ghar mein diya jalana tha