ye pahla hijr tha ye rut kabhi aai nahin thi

ye pahlā hijr thā ye rut kabhī aa.ī nahīñ thī

fazā-e-jāñ bhī pahle aise sahrā.ī nahīñ thī

jo galiyoñ galiyoñ uḌtī phir rahī thī shahr-bhar meñ

vo mere pyaar kī ḳhushbū thī rusvā.ī nahīñ thī

mire pahlū meñ ab maiñ bhī nahīñ hotā thā aksar

ye jo bhī mas.ala thā par ye tanhā.ī nahīñ thī

mujhe marnā bhī thā aur marne kā Dar bhī lagā thā

so maiñ Duubā udhar jis or gahrā.ī nahīñ thī

añdhere bebasī aañsū umiid aur ḳhvāb-e-fardā

mirī āñkhoñ meñ sab kuchh thā pa bīnā.ī nahīñ thī

mire māthe ko chūmā lab kahāñ chūme the us ne

ye bas dukh kī talāfī thī ye bharpā.ī nahīñ thī

hamāre haal par kahne lagīñ vo būḌhī āñkheñ

hamāre vaqt kyā duniyā tamāshā.ī nahīñ thī

achānak ye lagā ham-zād ho jaise vo merā

ka.ī barsoñ talak jis se shanāsā.ī nahīñ thī

bahut bechain thī tasvīr meñ vo shoḳh laḌkī

laboñ par husn to phailā thā goyā.ī nahīñ thī

ye pahla hijr tha ye rut kabhi aai nahin thi

faza-e-jaan bhi pahle aise sahrai nahin thi

jo galiyon galiyon uDti phir rahi thi shahr-bhar mein

wo mere pyar ki KHushbu thi ruswai nahin thi

mere pahlu mein ab main bhi nahin hota tha aksar

ye jo bhi masala tha par ye tanhai nahin thi

mujhe marna bhi tha aur marne ka Dar bhi laga tha

so main Duba udhar jis or gahrai nahin thi

andhere bebasi aansu umid aur KHwab-e-farda

meri aankhon mein sab kuchh tha pa binai nahin thi

mere mathe ko chuma lab kahan chume the us ne

ye bas dukh ki talafi thi ye bharpai nahin thi

hamare haal par kahne lagin wo buDhi aankhen

hamare waqt kya duniya tamashai nahin thi

achanak ye laga ham-zad ho jaise wo mera

kai barson talak jis se shanasai nahin thi

bahut bechain thi taswir mein wo shoKH laDki

labon par husn to phaila tha goyai nahin thi