ye raat hai ki teri chashm-e-sandalin ka fusun

ye raat hai ki tirī chashm-e-sandalīñ kā fusūñ

ki jhūmtā chalā jaatā hai kaif-e-hijr meñ dil

jamīl chehre pe āñkhoñ ke narm-rau halqe

ufuq pe hāla-e-mahtāb ko tarāshte haiñ

hamārī niiñd ke TuuTe hue shabistāñ meñ

tumhāre hoñT kisī ḳhvāb ko tarāshte haiñ

ye raat hai yā udāsī-bharī ḳhalāoñ meñ

bikher dī hai kisī ne mire vajūd kī ḳhaak

kahīñ pe raakh chamaktī hai ahd-o-paimāñ kī

kahīñ pe nam huī jaatī hai hast-o-būd kī ḳhaak

ye tum ye raat ye jaadū ye chāñd kā naġhma

ye tum ye manzar-e-mahtāb dekhtī huī maiñ

ye tum ye vaqt tumhāre huzūr jhuktā huā

kahīñ nahīñ huuñ magar duur tak kahīñ nahīñ maiñ

ye raat hai ki teri chashm-e-sandalin ka fusun

ki jhumta chala jata hai kaif-e-hijr mein dil

jamil chehre pe aankhon ke narm-rau halqe

ufuq pe haala-e-mahtab ko tarashte hain

hamari nind ke TuTe hue shabistan mein

tumhaare honT kisi KHwab ko tarashte hain

ye raat hai ya udasi-bhari KHalaon mein

bikher di hai kisi ne mere wajud ki KHak

kahin pe rakh chamakti hai ahd-o-paiman ki

kahin pe nam hui jati hai hast-o-bud ki KHak

ye tum ye raat ye jadu ye chand ka naghma

ye tum ye manzar-e-mahtab dekhti hui main

ye tum ye waqt tumhaare huzur jhukta hua

kahin nahin hun magar dur tak kahin nahin main