ye raat teri zulf-e-moambar to nahin hai

ye raat tirī zulf-e-mo.ambar to nahīñ hai

ye chāñd tirā chehra-e-anvar to nahīñ hai

har shaḳhs muqaddar kā sikandar to nahīñ hai

har ik ko ġham-e-ishq mayassar to nahīñ hai

samjhā hai jise saarā jahāñ amn kā dushman

vo shaḳhs mohabbat kā payambar to nahīñ hai

kis tarah bane dāman-e-mahbūb kī zīnat

aañsū hai mirī aañkh meñ gauhar to nahīñ hai

lā saktā huuñ maiñ chāñd sitāroñ ko zamīñ par

ye bhī mire imkān se bāhar to nahīñ hai

sūraj bhī shafaq rang huā jis kī talab meñ

vo manzar-e-rañgīñ pas-e-manzar to nahīñ hai

maslūb mujhe karke bhī kyā fikr hai tujh ko

charchā tirī bedād kā ghar ghar to nahīñ hai

maiñ dhuup kī shiddat se sulagtā huuñ sarāpā

chaḌhtā huā sūraj mire sar par to nahīñ hai

har sang se asnām tarāshe nahīñ jaate

is raaz se vāqif magar aazar to nahīñ hai

maiñ rok rahā huuñ magar aañsū nahīñ rukte

āñkhoñ meñ chhupā koī samundar to nahīñ hai

kyoñ us pe asar ho na tire jaur-o-sitam kā

is siine meñ dil hai koī patthar to nahīñ hai

go gard-e-tafakkur mire chehre pa hai lekin

ā.īna-e-ehsās mukaddar to nahīñ hai

maiñ jis ko 'hunar' chāroñ taraf DhūñD rahā huuñ

vo shaḳhs mirī zaat ke andar to nahīñ hai

ye raat teri zulf-e-moambar to nahin hai

ye chand tera chehra-e-anwar to nahin hai

har shaKHs muqaddar ka sikandar to nahin hai

har ek ko gham-e-ishq mayassar to nahin hai

samjha hai jise sara jahan amn ka dushman

wo shaKHs mohabbat ka payambar to nahin hai

kis tarah bane daman-e-mahbub ki zinat

aansu hai meri aankh mein gauhar to nahin hai

la sakta hun main chand sitaron ko zamin par

ye bhi mere imkan se bahar to nahin hai

suraj bhi shafaq rang hua jis ki talab mein

wo manzar-e-rangin pas-e-manzar to nahin hai

maslub mujhe karke bhi kya fikr hai tujh ko

charcha teri bedad ka ghar ghar to nahin hai

main dhup ki shiddat se sulagta hun sarapa

chaDhta hua suraj mere sar par to nahin hai

har sang se asnam tarashe nahin jate

is raaz se waqif magar aazar to nahin hai

main rok raha hun magar aansu nahin rukte

aankhon mein chhupa koi samundar to nahin hai

kyon us pe asar ho na tere jaur-o-sitam ka

is sine mein dil hai koi patthar to nahin hai

go gard-e-tafakkur mere chehre pa hai lekin

aaina-e-ehsas mukaddar to nahin hai

main jis ko 'hunar' chaaron taraf DhunD raha hun

wo shaKHs meri zat ke andar to nahin hai