ye rang ab ke faza mein naya naya sa hai

ye rang ab ke fazā meñ nayā nayā sā hai

ujāḌ-rut meñ bhī gulshan khilā khilā sā hai

udaas koī yūñhī to kabhī nahīñ hotā

ki us ke zehn meñ kuchh to dabā dabā sā hai

kamī nahīñ hai koī zindagī meñ ab lekin

hai koī zaḳhm jo ab tak harā harā sā hai

vo merā haath bahut kas ke thāmnā us kā

batā rahā hai ki vo kuchh Darā Darā sā hai

sabhī se bazm meñ hañs hañs ke mil rahā hai vo

jalā rahā hai mujhe yā ḳhafā ḳhafā sā hai

vo jis ke pyaar ne mujh ko bujhā diyā thā kabhī

sharāra ban ke vo man meñ dabā dabā sā hai

ye rang ab ke faza mein naya naya sa hai

ujaD-rut mein bhi gulshan khila khila sa hai

udas koi yunhi to kabhi nahin hota

ki us ke zehn mein kuchh to daba daba sa hai

kami nahin hai koi zindagi mein ab lekin

hai koi zaKHm jo ab tak hara hara sa hai

wo mera hath bahut kas ke thamna us ka

bata raha hai ki wo kuchh Dara Dara sa hai

sabhi se bazm mein hans hans ke mil raha hai wo

jala raha hai mujhe ya KHafa KHafa sa hai

wo jis ke pyar ne mujh ko bujha diya tha kabhi

sharara ban ke wo man mein daba daba sa hai