ye sach hai kabhi rah mein dariya nahin aaya

ye sach hai kabhī raah meñ dariyā nahīñ aaya

vo shaḳhs magar lauT ke pyāsā nahīñ aaya

is saal bhī is ghar meñ divālī nahīñ hogī

ghar lauT ke is saal bhī beTā nahīñ aaya

āñkheñ to har ik lamha chhalakne pe musir haiñ

ashkoñ ko magar poñchhne vaalā nahīñ aaya

ham vo haiñ jinheñ baiTh ke fursat meñ kisī din

hañsnā to baḌī baat hai ronā nahīñ aaya

aaheñ bhī palaT aatī haiñ nākām hamesha

is dil ko taḌapne kā salīqa nahīñ aaya

ashkoñ ko yahāñ poñchhne vaale to bahut haiñ

āñkhoñ ko salīqe se chhalaknā nahīñ aaya

ye sach hai kabhi rah mein dariya nahin aaya

wo shaKHs magar lauT ke pyasa nahin aaya

is sal bhi is ghar mein diwali nahin hogi

ghar lauT ke is sal bhi beTa nahin aaya

aankhen to har ek lamha chhalakne pe musir hain

ashkon ko magar ponchhne wala nahin aaya

hum wo hain jinhen baiTh ke fursat mein kisi din

hansna to baDi baat hai rona nahin aaya

aahen bhi palaT aati hain nakaam hamesha

is dil ko taDapne ka saliqa nahin aaya

ashkon ko yahan ponchhne wale to bahut hain

aankhon ko saliqe se chhalakna nahin aaya