ye sail-e-ashk mujhe guftugu ki tab to de

ye sail-e-ashk mujhe guftugū kī taab to de

jo ye kahūñ ki vafā kā mirī hisāb to de

bharī bahār-rutoñ meñ bhī ḳhaar le aa.ī

ye intizār kī Tahnī kabhī gulāb to de

nahīñ nahīñ maiñ vafā se kināra-kash to nahīñ

vo de rahā hai mujhe hijr kā azaab to de

ye ḳhāmushī to qayāmat kī jaan levā hai

vo dil dukhā.e magar baat kā javāb to de

har ek vāqi.a tārīḳh-dār likh jā.ūñ

ga.e dinoñ kī mire haath vo kitāb to de

ye dekh kis gul-e-tar par nigāh Thahrī hai

na de vo phuul mujhe dād-e-intiḳhāb to de

gunāhgār sahī phir bhī mere hisse kā

tirī taraf jo nikaltā hai vo savāb to de

ye sail-e-ashk mujhe guftugu ki tab to de

jo ye kahun ki wafa ka meri hisab to de

bhari bahaar-ruton mein bhi KHar le aai

ye intizar ki Tahni kabhi gulab to de

nahin nahin main wafa se kinara-kash to nahin

wo de raha hai mujhe hijr ka azab to de

ye KHamushi to qayamat ki jaan lewa hai

wo dil dukhae magar baat ka jawab to de

har ek waqia tariKH-dar likh jaun

gae dinon ki mere hath wo kitab to de

ye dekh kis gul-e-tar par nigah Thahri hai

na de wo phul mujhe dad-e-intiKHab to de

gunahgar sahi phir bhi mere hisse ka

teri taraf jo nikalta hai wo sawab to de