ye sham ka baDhta hua saya hai ki main hun

ye shaam kā baḌhtā huā saaya hai ki maiñ huuñ

tā-hadd-e-nazar aañkh meñ sahrā hai ki maiñ huuñ

āḳhir tujhe ye faisla karnā hī paḌegā

tere liye behtar tirī duniyā hai ki maiñ huuñ

tasdīq jo tū ne mire hone kī abhī kī

ye dekh ke maiñ ne bhī ye sochā hai ki maiñ huuñ

jhilmil kabhī ehsās meñ bikhrī to ye sochā

mahtāb kisī jhiil meñ utrā hai ki maiñ huuñ

aise hī tazabzub meñ paḌā soch rahā huuñ

bādal hī bahut TuuT ke barsā hai ki maiñ huuñ

manzar jo ye dekhā hai to dil kaañp uThā hai

ye shāḳh se TuuTā huā pattā hai ki maiñ huuñ

un āñkhoñ meñ kyā jāniye kyā baat hai 'ahsan'

dekhā jo kisī ne yahī samjhā hai ki maiñ huuñ

ye sham ka baDhta hua saya hai ki main hun

ta-hadd-e-nazar aankh mein sahra hai ki main hun

aaKHir tujhe ye faisla karna hi paDega

tere liye behtar teri duniya hai ki main hun

tasdiq jo tu ne mere hone ki abhi ki

ye dekh ke main ne bhi ye socha hai ki main hun

jhilmil kabhi ehsas mein bikhri to ye socha

mahtab kisi jhil mein utra hai ki main hun

aise hi tazabzub mein paDa soch raha hun

baadal hi bahut TuT ke barsa hai ki main hun

manzar jo ye dekha hai to dil kanp uTha hai

ye shaKH se TuTa hua patta hai ki main hun

un aankhon mein kya jaaniye kya baat hai 'ahsan'

dekha jo kisi ne yahi samjha hai ki main hun